احساس وحش اوى اوى

احساس وحش اوى

اما تبقى متمسك بحاجه وحاسس انك من غيرها ماتسواش
وتلاقى الحاجه دى غصب عنك بتبعد

وانت مش عارف تعمل ايه .. ولا الغلط من مين

وتفضل عامل زى الطفل الصغير اللى بيجرى ورا مامته وهى نازله تجيب حجات

ويقولها .. متسبنيش لوحدى

.................

احساس وحش اوى

اما تكون مخنوق وعلى اخرك ونفسك تعيط بجد

وتلاقى نفسك مره واحده دخلت فى مود تانى

وبقيت بتضحك ضحك هيستيرى

وتعدى ايامك وانت طاحن نفسك فى الشغل او الدراسة طول اليوم

لحد ما ترجع البيت مقتول وتدخل على السرير عدل

اصلك خايف يبقى عندك وقت فراغ يستغله عقلك ويرجعك فيه لذكريات بتحاول تنساها

................

احساس وحش اوى

اما تحلم بحاجه وتكبرها فى خيالك وتحاول تطبقها فى حياتك

وتعيش ايامك وانت مبسوط وفرحان والدنيا مش سايعاك

وفجأه .. تأتى الرياح بما لا تشتهى السفن

وتخطف الايام حلمك الجميل من بين ايديك

ويروح لحد غيرك قدام عنيك وانت مش قادر تعمل حاجه

...............

احساس وحش اوى

اما تفضل باصص فى موبايلك على رقم معين بالساعات .. وعنيك مليانه دموع

ومش قادر تدوس على زرار call

اصلك خايف من رد الفعل .. يمكن يجرحك زياده وتندم بعدها انك خدت الخطوه دى

..............

احساس وحش اوى

اما تمثل على حد دور مش حقيقى

وتحاول تضحك وتهزر عشان ميبانش قدامه انك لسه بتفكر فيه

او عشان متبقاش سبب فى هدم احلام بيحاول يبنيها مع اشخاص تانيين

وانت من جواك بتتقطع

على وشك ابتسامه .. بس جوه قلبك فى فراغ عمال بيوسع مع كل كلمه بتسمعها

عايز تقوله كفاااااايه متكملش .. بس مش قادر تقولها

اصله صاحبك الوحيد

............

احساس وحش اوى

لما تبقى عايز تعيط ومش قادر تمسك نفسك

ونفسك تكلم حد تشكيله همومك

حد بتحبه ونفسك يكون جمبك يمسح دموعك

وفجأه متلاقيهوش حواليك

اختفى .. ولا هو كان مجرد اوهام وسراب فى احلامك ؟

............

احساس وحش اوى

لما ترجع بذاكرتك لأيام طفولتك او شبابك

وتفتكر ناس اتربيت معاهم

ناس اكلت معاهم عيش وملح

ناس كنت بتفضلهم على نفسك

وترجع للواقع وتتصدم

اصلهم دلوقتى بيشوفوك ويبصوا الناحيه التانيه

..........

احساس وحش اوى

اما تبص فى عين حد عزيز عليك وتلاقى كلام كتير

كلام مريحك ومخليك طاير فى اعلى سما

وتحس بحاجه مطمناك مش عارف هى ايه .. ولا عارف مصدرها

وفجأه تتفاجأ ان الافعال غير اللى انت شايفه من النظرات

..........

احساس وحش اوى

اما تفتكر ذكريات لناس وايام كنت فيها مبسوط وفرحان

ايام عمرها ما هتتعوض

وتحس انها عمرها ما هترجع تانى ..

ولا عمر الناس دى ما هيرجعوا زى الاول

اصل ببساطه .. الحاجه لما بتتكسر وتصلحها لازم يفضل فيها شرخ او على الاقل اثاره

..........

احساس وحش اوى

اما تحس ان الوقت بيعدى عليك ببطء

بيعدى ويدبحك فى كل ثانية

وانت نفسك الوقت يجرى

لكن مفيش فايده

..........

بجد احساس وحش اووووووووووى