يوم بلا راس !!

صحيت الصبح ( غريبة مش كده ؟ اول مرة تشوفوا حد بيقعد نت وبيصحي الصبح ) جيت احسس علي دماغي لقيتني من غير دماغ !! نهار اسوح !! راحت فين دي ؟ يا دماغي اطلعي مش ناقصين لعب .. امال هاكل واشرب واسمع ازاي انا دلوقت ؟ والبت لما اقابلها هتشوف شعري وهو متجلجل ازاي وانا معنديش شعر اصلا ؟ يللا بقي هسيبها للشباب البايظ يعاكسوها , المهم اني صحيت لقيت ابويا وامي في وشي , ايه ياد اللي انت عامله ده ؟ الله يخرب بيتك لا يكون ستايل جديد !! حتي ابويا وامي مش فاهمين , عايز افهمهم بس مش عارف اتكلم , سبتهم وغيرت هدومي ونزلت , كل ما الناس تشوفني تضحك , يا جدعان طيب انا اعمل ايه ؟ مانا ماعرفش هي راحت فين , سمعت الناس بتقول : احنا مابنضحكش علي دماغك يا اهبل , احنا بنضحك علي انك لابس جيبة اختك , يا نهااااااااااار , مانا ماشفتش انا بلبس ايه ؟ بس الغريب اني كنت سامع , طيب ازاي سامع ومش قادر اشوف ولا اتكلم ؟
فكرت
فكرت
فكرت
فكرت
فكرت كتيـــــــــــــــــــــر
لحد ما استغربت تاني , ازاي قادر افكر وانا ماعنديش دماغ ولا عقل اصلا ؟
فكرت تاني
فكرت تاني
فكرت تاني كتيــــــــــــــــر
ولما مالقيتش حل , اتصلت علي 0900 !! بس ماسمعتش قالوا ايه , فقفلت الموبايل وارتحت , قلت تمام كده , يبقي انا لا اري , لا اسمع , لا اتكلم !!