مترجعيش

هددي ماتهدديش ... ترحلي ماترحليش

مش هاشتكي واتأكدي اني هاعيش

من غير دمعة حزن تنزل علي اللي راح

من غير ما اداوي حتي بالبسمة الجراح

صدقيني غصب عنك هابتدي من غير رتوش

حتي لو كانت بدايتي بين وحوش

ماترجعيش

واتأكدي ان مفيش واحد بييجي الكون ضعيف

لكن الظروف غصب عنه بتعمله انسان ضعيف

وانتي الظروف

وعشان ما اكون ابدا في يوم انسان ضعيف

ماترجعيش عشان اعيش

واتأكدي مهما كان البعد صعب , مستحيل يطفي شمعه نارها حب

ومهما كان الهجر نار , مستحيل يحرق القلب اللي حب

لكن

علشان كرامتي تنطفي كل الشموع

تنحرق كل القلوب اللي ماترحم يوم دموع

وصدقيني غصب عنك هابتدي من غير خضوع

لان نقطة ضعفي كانت في الدموع

في نظرة حنان

في سهم جارح في الجفون

في نبض قلب يكون حنون

لكن خلاص انا مش هاكون

زي زمان انسان حنون

وعشان اعيش

لازم اكون زي الجبان .. يطعن في الضلمة ويخون اللي خان

لكن طبعي مش بخون .. احب اعيش دايما في نور

واسعي لرزقي في النهار .. زي الصقور

وانتي الحطام ... وانتي بقايا اللي كان غرام

وانتي الظلام .. وعشان كده ماترجعيش

عشان ماموتش في يوم جبان

ماترجعيش وماتهدديش بالرحيل

لان صعب الصعب .. ان عاشق يقبل يكون ذليل

دا مستحيل

او يرتضي بالهوان .. او ينحني علشان يعيش

وانتي الهوان والانحناء

ماترجعيش

لان قلبي انحني علشان يعيش

ماترجعيش

ماترجعيش